Act 26 | TVK | STEP | Di, Akripa biteni mi Pol bitene, “Namae ni xouk tengan usep motin rin nam e ngongoren ak minou.” Ma Pol misa hen be nesao tengan litit votei. Di, misepin pe met moletin xil bitene,

Acts 26

Pol Misep Kil Rin Nan Pe Met Suv Toto Akripa

1 Di, Akripa biteni mi Pol bitene, “Namae ni xouk tengan usep motin rin nam e ngongoren ak minou.”

Ma Pol misa hen be nesao tengan litit votei. Di, misepin pe met moletin xil bitene, 2 “Suv Toto Akripa, namaal pupu ve mesal xa lasa ni minou tengan nisep motin rin navan e ngongoren ak minuk ve naha xa Siu xil di lasep sisil nou ven. 3 Bos tengan ulonge, vengan xa okil kuh sexien xil vus na Siu xil tuei del ngongoren nae xil. Ma nasisuk tengan uteong ni nou li ihe vuteili tang.

4 “Siu xil vus lakil meulien navan, melele xa natehe horam maxoe mei duxoh xosali ak, e naha xa natepol ni e ut xati navan e e Serusalem mun. 5 Xosxa usis xil, xil tang likila lihiteni minuk xa, tetiamu, natemos tetel vanut Siu tei xa lakes xil ni Parasi e nanggusil kuh sexien nae xil. Vanut Siu xil ak di lalong xat rae namem xil mili vanut Siu sav xil. 6 Ma taxeak, di nasoh e von koten ak vengan xa di naling nenesien navan e hitxatien xa Hi tepol ni tetel xat avu namem xil tetiamu. 7 Moletin namem xil vus xa lastal langgo vatimol namem xil xa labe lu e le (12), xil ngasen di laling nenesien nae e hitxatien ak tengan mei istal ihe reitin melele xa di lamot mi Hi e melengien e vongien xil. Mak iaxa, Suv Toto, ve nenesien navan e hitxatien ak, Siu xil ak di lasep sisil nou.”

8 Di, Pol biles pus Siu xil xa ladi e von koten ak e biteni mi xil bit, “?Siu xil, veneh ma xamim xa mubit Hi mikila isak ni moletin imeul rilomun ra maten, mukameti nggeih tengan muke reitin xa Hi pol ni Iesu temeul rilomun ra maten? 9 Tetiamu, inou mun natenemi tengan nisak purun ngan xil xa laneket e his Iesu tahal Nasaret. 10 Ngan ak iaxa natepol ni e hal Serusalem. Vat xil na pris xil latmae ni nou tengan nital xat moletin eo xil xa laneket e Iesu e niso xil lihe nim te xeih. E melele xa latemei tengan lavas xil lalel, inou mun namaen ni tang. 11 Melengien xil holu, natehe nim te pispisien na Siu xil, e melele xa natekamet rute ngan xil en, di natehas pangas xil tengan lisepin isa e his Iesu e lipol ni hitxatien tengan linahusili ti mun. Ieok teat pupu ni xil mak, misak ni di natehe taon sav xil mun tengan ti nihol rerat xil en.”

Pol Misep Usil Naha xa Testal Mini e Suse xa Be Damaskas

12 Pol misepin mi moletin xil mun bit, “Usil nenemien nen tak, vat xil na pris xil latesil nou natehe Damaskas tetel xeihen nae tengan nipol vuol ni rae xil nae. 13 E Suv Toto, melele xa natehusil suse nateha, e piniae vari, miehen tei testal xa temihinehin teli eai texo ut nesao temei, mei teleluv xol nou tetel moletin xil xa latetel xat nou mateha. 14 Misak ni xamem vus matekiri matehe tan. E inou, natelong rae tei xa tesepin minou texo sepinien na Siu xil tehitene, '!Sol, Sol! ?Veneh ma di opurun nou? Di osa pangasien mi xouk mun tang melele xa di obae del nou. Onggoni buluk tei xa suv nan di measi melele xa di pol ni vatin.' 15 Ma nabit, '?Suv, xouk visi?' E xi bit rilomun ni minou bit, 'Inou Iesu, ngan xa di osak purun ni. 16 !Tamea! Nastal minuk xosali vengan xa nabosei xouk tuei tengan mei ove moletin te polien navan. Ha uhit mese ni naha xa otepusi usil nou xosali e naha xa nipisen ni minuk e melengien xil xa ti imei. 17 Inou niketeh xolok ra Siu xil. E niketeh xolok mun ra ngan xil xa latave Siu ti xa di nasil xouk tengan uhe visal xil. 18 Xouk, uleh rerat xil ra maluxoluken xa da xat xil, mei lipus kil miehen navan. Reitin, ixo xouk nileh rerat xil ra xeihen na Temat, mei liti e xeihen na Hi. Mak, ma melele xa liling neketen nae e nou, nileh rerat tesaen nae ra xil, e mei lihur von ne xil itel moletin eo xil xa Hi tehosei xil.'

Pol Misep Usil Polien Nan

19 “Ma Suv Toto, natehusil xat kuh metuveen xa natepusi texo ut nesao. 20 Misak ni, e hal Damaskas, natesetu mi moletin xil vus tengan lihiles ra tesaen nae xil e lipol ni holesok xil xa ipisen ni xa xil latsa meulien nae mi Hi. Di, natesetu ni mun temak e Serusalem, e ut xil ngasen e provins tahal Sudea. Di, natesetu ni mun mi ngan xil xa latave Siu ti. 21 Ve sexien ak vari iaxa Siu xil latetal xat nou e vioh te Nim Eo melele xa namei tengan namot mi Hi, e latesak tengan lavas nou namat. 22 E Hi di dutou ni nou duxoh xosali ak, ma nasoh inggak e di nasep usil longeongen hos usil Iesu Kristo mi xamim vus, mi eilep xil e mi movotei xil mun. Naha xa inou di nabiteni mi xamim nggoni ngan taxa provet xil tetiamu del Mosis lateke mese ni latehit mei istal. 23 Latehiteni xa Kristo xa Hi tehosei ha ilong pangas xi e ha imat. Ti, xi vari iaxa imeul rilomun ra maten itiamu ni moletin sav xil tengan ipisen miehen te meulien mi Siu xil e mi ngan xil xa latave Siu ti.”

24 Melele xa Pol di tamu misep motin rin nan e ngongoren ak, Festas mikei nggeih e misep pepamen ba mini bitene, “!Pol, otallang tova tang! !Kilakilen nam xai di misak ni xouk otallang pupu!”

25 E Pol bit rilomun ni mini bit, “Suv Festas, inou natatallang ti. Sepinien te reitinen e metisoen iaxa di nabiteni xiak. 26 Suv Toto xai mikil holesok xil ak ngamu, e nakila namiteni vamal tang mini. Xi mikil kuhi vengan xa holesok xil ak tastal ti vaxo suse te xusen.”

27 Pol miketeh momal ba ni Akripa e biteni mini bitene, “?Suv Toto, xouk oke reitin e sepinien na provet xil? Nakila xa xouk okila.”

28 E Akripa bit rilomun ni mini bit, “?Pol, onemi obit okila opol ni nou namei name Kristin komanon?”

29 E Pol biteni mini bitene, “Neta sav xa ove Kristin komanon mu veter luvoluv mu, nasis mi Hi tengan xouk, itel xamim vus xa di muteong ni nou xosali, ti mumei muneket muxoni nou ... e sen xil ak ihe tovuol e hemim.”

30 Melele xa Pol misepin bus, Suv Toto Akripa, vat te kavmen Festas, Bernis, del xil vus xa latotan tetel xatel, latamea laba. 31 E melele xa di laba, di labiteni mi xil mun tang labit, “Moletin ak tapol ni ti neta vasa tengan ha vamat ven mu vahe nim te xeih ven.” 32 E Akripa biteni mi Festas bit, “Vahit moletin ak nasisuk ti tengan usa ni vahe visal Suv Toto tahal Rom, ma bos tengan ha ven vamase.”